Inisio
Informashon
 

Reglanan di skol ta kompilá segun e siguiente puntonan di bista.

A. Siña karga responsabilidat

B. Komunikashon korekto

C. Palabrashonnan

D. Kuido pa ambiente propio

E. Komportashon sosial korekto.

A.  Responsabilidat

1.        Skol ta kuminsá 7:30 i kaba 12:30

2.        Alumnonan ta bin skol unifòrmá.
Unifòrm ta konsistí di:
Pa mucha muhé:
Un saya-karson blou-shinishi kuadrá i blusa blanku ku krag rondó di mes un tela ku e saya-karson.
Pa mucha hòmber:
Un karson treskuart blou-shinishi kuadrá ku kamisa blanku ku krag di mes un tela k’e karson treskuart.

Tantu e blusa di e mucha muhé komo e kamisa di e mucha hòmber tin e emblema di skol dilanti na man robes.

Sapatu òf kèts ku mea largu blanku riba ènkel.
Kamisa/blusa ta den karson/saya-karson tur momentu.
E unifòrm pa gemnastik i aktividatnan deportivo despues di skol ta konsistí di un karson kòrtiku blou i un T-shirt blanku. E unifòrm aki ta obligatorio pa tur alumno.
Partisipashon na lèsnan di gemnastik tambe ta obligatorio. Solamente ku un karta di dòkter por duna un alumno dispensashon pa hasi gemnastik.
Preferibel no laga bo yu bin skol ku kosnan di balor. Manera renchi, kadena, armbant, èts.
Por haña unifòrm i trahe pa gemnastik kumpra na Cambes.

3.        Alumno ta traha su hùiswèrk kompleto i bon (Konsultá reglanan di hùiswèrk)

4.        Kada alumno tin un tas di skol pa hinka buki i skrefnan na un manera adekuá aden. Esta buki i skrefnan separá for di kuminda.

5.        Tur maestro ta respetá tur alumno i maestro. I tur alumno ta respetá tur maestro i alumno.

6.        Por bandoná klas solamente ku pèrmiso di maestro.

7.        Tur hende ta uza solamente palabra adekuá ku otro.

8.        Ta solushoná tur problema papiando.

9.        Tur loke bai kas pa mayornan firma ta bin bèk firmá.

10.   Si un alumno falta skol e mester presentá e dia ku e bin skol bèk ku un karta di mayornan den kual e motibu di e faltamentu di skol ta pará.

  B Komunikashon korekto

1.        Alumnonan ta komuniká nèchi ku otro.

2.        Tur informashon importante pa mayornan ta bai por eskrito.

3.        Semper ta eksistí e posibilidat pa tuma kontakto ku e maestro, pero esaki mester sosodé promé òf despues di ora di skol. Den e kaso aki ta bon pa traha un sita pa e maestro traha tempu pa bo.

  C Palabrashonnan.

1.        Alumnonan ta drenta kurá di skol asina ku nan yega skol.

2.        Alumnonan ta keda den kurá di skol 7:30 i 12:30.

3.        Den kaso di urgensia mayornan ta avisá kabes di skol promé ku bai buska e yu na klas.

4.        Na momentu ku e promé bèl zona tur alumno ta bai para den rei i keda ketu pa drenta klas trankil.

5.        No ta pèrmití pa kou bals ni kome mangel na skol.

6.        Solamente ku pèrmit di maestro alumnonan por trese kos di hunga skol.

7.        No ta pèrmití niun mucha hòmber nobo na skol ku flèktu, kralchi den kabei i “staartje”, èts. E kabei mester ta kòrtiku pelá.

8.        Tampoko ta pèrmití mucha hòmber ku renchi orea na skol i den niun aktividat eskolar.

  D Kuido di material i ambiente propio

1.        Den tur sirkunstansia mayornan ta responsabel pa daño hasí na edifisio i material di skol. Den kaso di destrukshon esun kulpabel mester kubri e gastu. Mester regla pagamentu di artíkulonan di skol dañá ku kabes di skol.

2.        Mayornan mes ta kumbiní ku otro kon nan ta regla dañonan hasí na propiedat di otro alumno.

3.        Alumnonan ta responsabel pa un skol limpi.

4.        Telefòn selular.

·             Ta bon pa instruí e yu ku na skol e telefòn ta keda den su tas.

·             Skol no ta responsabel pa pèrdida di telefòn.

·             Skol no ta pone ningun alumno responsabel pa pèrdida o daño na telefòn di otro alumno.

·             Bou di ora di skol (7:30 pa 12:30) e telefòn ta pagá den tas.

·             Den kaso ku un telefòn zona durante ora di skol e alumno ta entregá e telefòn na e maestro ku aserk’é. Un mayor ta bin tum’é serka kabes di skol.

·             Den kaso di ladronisia na skol nos lo hasi denunsia na polis. I por lo demas nos no ta responsabel pa e telefòn aki.

E Komportashon sosial korekto

1.       Kada miembro di Fatima College ta respetá i tene kuenta ku otro, opinion di otro i kosnan di otro. Tantu den klas komo pafó di klas.

2.       Nos ta hasi weganan ku ta positivo ku otro.

3.       Mainta, den pouze i mèrdia tin “surveillance”.

   (vigilansha di parti di maestronan)
Durante di pouze alumnonan ta keda riba nan “speelplaats”.