Komunikado di Prensa “Startconferentie 2016”

Direktiva di Skolnan Katóliko na inisio di kada aña eskolar ta organisá un konferensia pa su personal dosente i no dosente. Dia 8 di ougùstùs 2016 esaki lo tuma lugá pa di 18 aña konsekutivo. Tur aña direktiva ta skohe un tema i basá riba esaki ta indiká puntonan relevante pa su maneho general. Tambe ta indiká aspektonan pa tantu dosente komo no dosente por profeshonalisá ariba.

E aña akí e tema ta: “Teamwork makes the dream work”. E soño di tur esnan ku ta traha riba tur nivel den kuadro di e mishon di direktiva di skolnan Katóliko ta, pa duna guia i kompañá nos muchanan riba nan kaminda pa haña felisidat. Felisidat, basá riba norma i balornan kristian.

Trabou di e trahadó den enseñansa ta noble i ta rekerí fe, amor i speransa pa yega na e felisidat menshoná anteriormente. Diariamente nos dosentenan ta enkontrá bareranan grandi den nan trabou, pero mayoria ta persistí kontra bientu i mareo, pa logra e mishon . E mishon ta: Eduká e mucha pa e bira un siudadano felis i responsabel.

Teamwork makes the dream work. Kada maestro tin su propio talento, kreatividat I konvikshon pa eduká su alumnonan. Pero ta probá ku ora koleganan reinforsá otro ku diversidat di talento i esfuerso, e logronan ta mas mihó.

Durante e konferensia e aña akí lo tin tres diskurso ku karakter di motivashon profeshonal pa inspirá nos koleganan individualmente pero tambe komo miembro di un tim pa realisá e soño.

Stichting R.K Centraal Schoolbestuur - © 2018