Speech Dia di Enseñansa 2018

Distinguido presentenan,

Riba e dia akí, mi ke kuminsá ku yama danki di kurason pa e trabou di tur hende ku ta traha den enseñansa. Danki pa yuda hubentut desaroyá su abilidatnan sosial i haña e konosementu nesesario pa para riba su mes pia.

Manera e tema di awe ta indiká, moveshon i alimentashon tambe ta importante riba e tereno akí. Años kaba tin indikashon ku moveshon no solamente ta bon pa salú, pero tambe pa konsentrashon, motivashon, komportashon sosial i asta prestashon na skol. Nada di esaki no ta notisia. Al kontrario. Hopi hende ta mashá aktivo riba e tereno akí.

Otronan ta inventivo pa proba lo kontrario. Mi mes tin un konosí ku ta puntra pakiko lo e kansa su kurpa djis pa finalmente e muri mas salú. Un otro a sigurá mi ku kada hende ta nase ku un kantidat spesífiko di ‘sla di kurason’ ….. i e nó tin niun intenshon di kore rònt gasta nan.

Di tur manera, awe mi ke pidi atenshon pa moveshon riba otro tereno: I esei ta moveshon den tumamentu di desishon. Moveshon ku e meta pa kibra e parálisis di desishon ku tin kos wantá. Laga nos kuminsá na promé lugá serka nos mes komo direktivanan di skol. Pero e ta konta tambe pa gobièrnunan i e ministerionan konserní. Mirando ku no ta tuma desishon ni sikiera riba rooster di fakansi, maske 8 direktiva di skol a prepará i akordá e trabou preparatorio, no tin mihó kaminda pa praktiká moveshon.

Si nos hinka ritmo di kualke un di nos bailenan den e proseso di desishon, kos lo kana mihó sigur. Pa mi parti kuminsá ku e ritmo di un wals trankil. Basta e trese konsistensia den e proseso di desishon, i e kortesia pa move kara-kara i tene otro su man di kuminsamentu te final. No ta nos kustumber pa dirti bai, laga nos partner e so riba dansflur. Awèl mester bira kustumber tambe pa kana tur proseso di desishon kabalmente i kompletamente. I kòrda ku e wals ta djis pa trein kon ta kuminsá i kaba huntu te final. Djei mester piki un piesa ku mas pèp. Pasó pa tuma desishon, nos no por sigui bira-bira riba e mes mosaiko. Ta dilanti nos mester bai.

Meskos ku ehersisio i alimentashon, moveshon den tumamentu di desishon tambe ta kuestion di boluntat i kompromiso. Boluntat pa skucha otro i alimentá nos mente ….. i e kompromiso pa move, balia, jump, òf wapa bai dilanti pa yega na desishonnan final.

Masha danki.

  1. van Lamoen-Garmers na nomber di tur direktiva di skol. 3 desember 2018
Stichting R.K. Centraal Schoolbestuur - © 2018